Balay, nauram

SANTIAGO, Ilocos Sur – Pinanawanna apagbiit ti balayna ta napananna inyapon ti bakana ngem idi nagsubli, maur-uramen ti balayna.

Dagus a nagresponde ti kapolisan ken bumbero ditoy nga ili apaman a naawatda ti report idi agarup 4:20 ti malem ti Nobiembre 23 a maur-uram ti bungalow ni Dominador Gaoat, Jr. y Mamasik, 40, naasawaan, mannalon ken residente iti Barangay Dan-ar, ditoy nga ili ket nadepdep ti apuy idi agarup 4:45 iti dayta met la nga agmalem.

Mapattapatta nga agbalor iti P300,000.00 dagiti sanikua a dimmapo gapu iti uram. Nupay kasta, awan ti naireport a nadangran.

Iti pannakaisurat daytoy, di pay ammo ti nagtaudan ti uram.#