Balay, nauram; baket napulpogan

SINAIT, Ilocos Sur – Pannakaliway iti lutlutuen ti nakagapu iti pannakauram ti maysa a balay ken nakatayan ti maysa kadagiti bumalay sadiay Barangay Masadag ditoy nga ili idi Enero 25.

Segun dagiti bumbero ti Sinait Bureau of Fire Protection ken dagiti polis a nagresponde idi naireport ti uram idi agarup 1:15 ti parbangon ti nadakamat a petsa, nangrugi ti uram iti kusina ket maitudo a naliwayan ti maysa kadagiti bumalay ti apuy kalpasan ti panaglutona.

Naireport a nakubong iti uneg ti balayda ni Beatriz Trumbaga y Abella, 70, a puon ti nakapulpoganna.

Nagsagrap met iti pannakaladam iti saka ken ima ni Rosity Sy y Abella, 76, ngem nakaruarda ken ni Maria Landeza y Abella, 78, a kabsatna, iti maur-uram a balayda.

Mapattapatta nga agbalor ti nadadael a sanikua iti P70,000.00.#