Balay para kadagiti awanan, ipatakder ti Gawad Kalinga iti Vigan City

VIGAN CITY – Inaprobaran ti konseho ditoy bayat ti sessionda itay Nobiembre 6 para iti pinal a pannakaibasana ti maysa a resolusion a mangited iti otorisasion iti mayor ditoy a makikontrata iti maysa a pondasion para iti proyekto ti pabalay ditoy.

Sagudayen ti nasao a resolusion a maited ken ni Mayor Eva Marie S. Medina ti autorisasion a sumrek iti kontrata iti Gawad Kalinga Community Development Foundation, Inc. para iti proyekto ti pabalay a maipasdek iti Barangay Capangpangan ditoy a siudad.

Kinuna ni Konsehal Ever Molina, nangilungalong iti nasao a resolusion, a sagut ti nasao a proyekto kadagiti residente ditoy nga agingga ita, awan pay ti kabukbukodanda a pagtaengan.

Mapili dagiti benepisario iti nasao a proyekto babaen ti rekomendasion ti screening  committee nga idauluan ti City Social Welfare and Development Office a prioridad a maikkan dagiti residente ditoy a talaga awan ti bukodda a balay.

Inlawlawag ni Molina nga awan ti mabusbos ti gobierno ti siudad iti nasao a proyekto no di laeng ti panangidonarna iti lote a pakaipatakderan dagiti balay. Dagiti mapili a benepisario ti tumulong iti pannakaipatakder dagiti balay nga aggapu dagiti materiales manipud iti Gawad Kalinga Foundation.

Segun kenkuana, kabinnulig ti city government ti Rotary Club iti pannakaipasdek ti nasao a proyekto.

Kalpasan ti deliberasion, naaprobaran ti resolusion para iti pinal a pannakaibasana.

Nupay kasta, kinuna ni Vice Mayor Franz Ranches a manamnama a bumisita dagiti mangibagi iti nasao a pundasion para iti powerpoint  presentation iti nasao a proyekto tapno ad-adda pay a malawlawagan dagiti kameng ti Konseho.#