CAOAYAN, Ilocos Sur – Linamut ti apuy ti maysa a balay iti Barangay Caparacadan ditoy nga ili idi malem ti Oktubre 16.
Dimmapo ti bungalow a balay ni Gloria Gascon y Jimenez, 60, baak, ken residente iti nadakamat a barangay gapu iti uram a napasamak idi agarup 2:30 ti malem ti nadakamat a petsa.
Segun iti report, awan dagiti agnaed iti balay idi mauram agsipud ta napanda naki- Black Rosary iti barangayda.
Dagiti kaarruba ti biktima ti nagpaarayat iti bumbero ti munisipio kalpasan a nakitada ti napuskol nga asuk a nagtaud iti balay ni Gascon.
Saan pay nga ammo ti pateg ti dimmapo a balay ken no ania ti nakagapu iti uram.#