VIGAN CITY- Dagiti babaket ken lallakay a matartaraken iti Balay Taripato ti nagbalin a benepisario ti Handog Pamasko a programa ti DWRS ditoy.
Naipaayan iti libre a noche buena dagiti matartaraken a babbaket ken lallakay a napataud manipud kadagiti regalo ken tulong dagiti agdengdengeg iti nasao a estasion ti radio.
Naipasdek ti Balay Taripato kas tulong ti gobierno probinsial iti panangidaulo ni Gov. Deogracias Victor Savellano kadagiti lallakay ken babbaket a kasapulanda ti pannaripato ngem awanan kadagiti kabagian a mangasikaso kadakuada.
Isaysayangkat ti DWRS daytoy a gannuat tapno maparagsak dagiti indigent a lallakay ken babbaket iti pannakaselebrar ti Paskua.#