Balay Taripato, suportado ti mayor ti Cabugao

Cabugao, Ilocos Sur- “Lumakay ken bumakettayo amin. Ngarud ipariknatayo ti dungngotayo kadagiti nataengan a kameng ti pamiliatayo,” daytoy ti kinuna ti mayor daytoy nga ili  bayat ti pannakaangay ti umuna nga anibersario ti Balay Taripato annex idi Nobiembre 24 ditoy.

“Nagpintas ti naganna a Balay Taripato, nagdungngo a denggen,” kinuna ni Mayor Edgardo Cobangbang sana innayon a “napateg ti kaadda ti kastoy a programa ti gobierno para kadagiti nataengan isu a masapul a suportaran ken pagtitinnulongantayo a pasayaaten.”

Innayon pay ti mayor nga apaman a nagtugaw a kas local chief executive ti ili a Cabugao, siniguradona nga agbalin ti ilina a senior citizen friendly babaen ti panangsuportana iti amin nga addang dagiti nataengan ditoy.

Kabayatanna, kinuna ni Provincial Social and Development Officer Ferdinand Concepcion  a sidudungngo a matartaripato dagiti duapulo a nataengan a residente ditoy nupay inannugotna nga agkurkurang dagiti caregivers ken nurses a mangay-aywan kadagiti nataengan iti uneg ti duapulo ket uppat nga oras. Iti agdama, adda laeng sangapulo ket dua a mangay-aywan kadagiti residente.

“Maipapaay met a amin a kasapulan dagiti lolo ken lola nga adda ditoy. Adda dagiti inaldaw a routine nga ubraenda kas iti panag-ehersisio iti bigat, dagiti makabael, maikkanda iti gundaway nga aggarden, adda met gundaway nga agtitiponda para iti socialization ken Bible sharing,” kinuna ni Concepcion.

Kinuna ni Concepcion nga agtultuloy nga agawat ti Balay Taripato kadagiti nataengan nga awanan pagtaengan, abandonado ken nabaybay-anen.

“Kasapulan laeng nga iyasideg ti kaso kadagiti municipal social welfare and development officers tapno ma-evaluate ti kasasaad ti nataengan sakbay a naiserrek iti Balay Taripato,” impaganetget ni Concepcion.

“Ti laeng idawdawatmi kadagiti residente, iyan-anusda koma ti kabaelan nga ipaay kadakuada ti probinsia. Kadagiti met mangay-aywan kadakuada, ipanda koma amin a kabaelanda iti panagserbida kadagitoy a nataengan,” kinuna pay ni Concepcion.

Agtultuloy met ti panangipaay ti Suero Hospital iti libre a serbisio medikal kadagiti residente ti Balay Taripato a nairugi idi maipasdek daytoy idi napan a tawen.#