Balay ti balikbayan, sinerrek dagiti mannanakaw,; 3 laptop, kamera, natakaw

BANTAY, Ilocos Sur –  Pinanawanda ti balayda idi rabii ti Abril 10 ta napanda pimmasiar iti family houseda ngem ginundawayan metten dagiti mannanakaw ti kaawanda ket sinerrekda ti balayda sada intaray dagiti laptop ken kamerada.

Nagpulong iti polis ditoy Magsingal ni Rhodora Wustmann y Molina, 42, naasawaan, Filipino-German citizen, ken residente iti Barangay San Basilio, a sinerrek dagiti mannanakaw ti balayda ket napukaw ti tallo a laptop nga Acer, Lenovo ken Samsung, maysa a Sony camera ken dagiti German passports dagiti annakna ken ti Philippine passportna.

Segun iti biktima, dina nadlaw a natakawanda idi nagsublida iti agarup 11:00 ti rabii ti abril 10 ket sada la naduktalan ti panagtakaw idi agarup alas 9:00 ti bigat ti Abril 11 idi masukalanda a nakalukat ti akinlikud a bintana ti balayda ken awanen dagiti laptop ken kamera ken passportda.

Mapattapatta nga agbalor dagiti laptop ken kamera iti sumurok kumurang P100,000.00.

Kabayatanna, dakkel a problema ni Renalyn Santos y Espiritu, 26, balasang, ken residente iti Barangay Cabaroan no kasano a mapasublina dagiti napukaw a kuarta ken selpon tapno saan a pagabunuen ti akinkukua iti Bigmak Burgers a pagpapaayanna.

Iti pulongna iti polis, kinuna ni Santos a nairidep bayat ti kaawan ti parokianona ket idi makariing, awanen ti asul a back pack nga inkabilna iti abayna a mapapati a kinurimes dagiti di pay nabigbig a mannibrong bayat ti pannakailibayna.

Mapapati a naglaon ti back pack iti P180.00 ken tallo a Nokia cell phones nga aggatad iti P15,500.

Iti panagimbestiga dagiti polis, nasarakanda ti nasao a back pack iti amianan ti stall, aganay a 200 metro ti kaadayona iti stall.

Binigbig ti biktima ti nasao a back pack ngem di pay ammo ti kinasiasino dagiti nangitaray iti naglakuanna ken selponna.#