Balay ti balo, dimmapo iti uram

STO. DOMINGO, Ilocos Sur – Linamut ti uram ti balay ti maysa a balo sadiay Barangay Cabaritan ditoy nga ili idi aldaw ti Marso 18.

Nagresponde dagiti bumbero ti Bureau of Fire Protection ken polis ditoy nga ili apaman a nakaawatda iti tawag a maur-uram ti balay ni Emma Tesorio y Adriatico, 60, balo, ken residente iti nadakamat a barangay, ket nakontrolda ti uram iti agarup 10:45 ti bigat ti nadakamat a petsa.

Limtuad iti inisial nga inbestigasion a nagtaud ti apuy iti fuse box iti balay ti balo.

Total a dimmapo ti dua a kuarto ken living room ti balay a mapattapatta nga agbalor iti P500,000.00.#