Balay ti court employee, natakawan

STA. CATALINA, Ilocos Sur – Natakawan ti balay ti maysa nga empleado iti korte bayat ti idadar-ayda iti maysa a piesta idi rabii ti Disiembre 29.

Nagreport iti polis ni Prudencio Rapadas, 47, naasawaan, court employee ken residente iti Barangay Pangada, ditoy nga ili a naserrek ti balayna ket natakaw ti nakadulin a kuarta ken alahasda idi rabii ti Disiembre 29.

Segun ken ni Rapadas, pinanawanda a nakakandado ti ridaw ti balayda ket napanda nakipiesta sadiay Barangay Fuerte, Caoayan.

Agarup 1:00 ti parbangon idi naggawid da Rapadas.

Idi agsukat koman ni baketna, iti kuartoda, naduktalanna laengen  a naporsar a naluktan ti Orocan dura box ken kayo a kabinet a nakaikabilan ti sumurok kumurang P173,000.00 ken alahasda nga agbalor iti P20,000.00.

Saan pay a naammuan ti kinasiasino dagiti nangisayangkat iti panagtakaw.#