Balay ti Paskua ni Santa, paborito a pagparetratuan dagiti turista

VIGAN CITY – Nagbalinen a paborito a pagpasiaran ti Balay ti Paskua ni Santa iti sanguanan ti provincial capitol sipud pay nasilawan ken naluktan daytoy itay nabiit.

Mismo a ni Gov. Ryan Singson ken dagiti opisial iti probinsia ti nangigannuat iti ceremonial lighting iti Balay ti Paskua ni Santa nga inimatangan dagiti empleado ti kapitolio ken dagiti bisita.

Saanen a krismas tri ti naipatakder iti sango ti kapitolio no di disenio ti maysa a pagtaengan a nadekorasionan kadagiti nabursi a silaw, simbolo ti kinapateg ti maysa a pamilia iti daytoy a pannakaselebrar ti Paskua.

Kinuna ti gobernador a naragsak ti pannakarambak ti Paskua no agtitipon dagiti amin a kameng ti pamilia. (Manipud iti report ni Edison Raboy)