Footer

Balay ti retirado a soldado, nasukisok; paltog, 4 granada, balbala, nakumpiska

BURGOS, Ilocos Sur – Makalawas sakbay ti barangay elections, pimminget ti kapolisan ditoy iti kampaniada maikontra iti agraira nga armas.

Kas resulta, paltog ken granada ti nakumpiska dagiti nagtipon nga elemento ti ISCIDG nga indauluan ni Police Chief Inspector Modesto Carrera, PIB, ISPPSC ken HPG iti insayangkatda a panagsukisok iti balay ti maysa a retirado a kameng ti Philippine Army.

Nainaganan ti retirado a soldado a ni Benjamin Dasalla y Dolfu, 57, ken residente iti nadakamat a barangay ken mapapati a supporter ti agdama a barangay captain ti Cadacad.

Nakakumpiska dagiti polis iti pagtaengan ni Dasalla iti dua a rifle grenade nga addaan serial number R-768AVA0055-84 ken M76-RG-600-K91-03, maysa nga MKIV hand grenade, maysa nga smoke grenade, maysa nga awanan lisensia nga Armscor Cal. 45, magasin para cal. 45 pistol, 8 a live ammo para cal. 45, 6 nga M203 ammunitions, 3 cal. 50 ammunitions, ken pouch para M203 ammunitions.

Mapapati a nailibas ti suspek nga inyalis ti paltogna a cal. 5.56 Armalite nga isu ti maysa kadagiti nailanad iti search warrant iti balay ti barangay captain sakbay a nakasangpet dagiti nagsukisok.

Segun iti report, mapapati a kuinestionaran pay ti barangay captain ti autoridad dagiti search team idi inimbitaranda a mangsaksi iti pannakaiwayat ti panagsukisok.#