Footer

Balay ti suspek iti panaghold-ap, narikisa, 2 paltog, balbala, nakumpiska

SAN JUAN, Ilocos Sur – Nanayonan ti kaso a sanguen ti maysa a suspek iti panaghold-ap kalpasan a nakakumpiska dagiti polis kadagiti paltog ken balbala iti panagsukisok nga insayangkatda iti pagtaenganna iti Barangay Caronoan ditoy nga ili idi malem ti Hulio 8.

Nakakumpiska bayat ti panagsukisok dagiti nagtipon nga elemento ti Ilocos Sur PPO, ISPPSMC, San Juan ken Cabugao nga indauluan ni Police Supt. Panfilo Racho iti balay ni Odon Quilala y Canarias, 36, naasawaan, residente iti nadakamat a barangay, iti maysa a caliber .45 pistol, black holster, 2 magasin para cal. 45 a naglaon iti 18 a bala ken 1 a cal. 45 MKIV Colet nga addaan iti maysa a magasin a naglaon iti 6 a bala.

Positibo a binigbig ni Richard Nool y Garcia, 26, naasawaan, empleado ti Globe, taga-Paniqui, Tarlac ngem temporario nga agnaed iti Barangay Mabusag, Badoc, Ilocos Norte,  ni Quilala a maysa kadagiti uppat a nanghold-ap kenkuana idi agsapa ti Hulio 8 iti asideg ti Fiber Optic Cable a masarakan iti Barangay Cuancabal, Cabugao, Ilocos Sur.

Iti inisial nga inbestigasion dagiti polis, madama ti superbision ni Nool iti panagkali dagiti trabahadorna idi nagsardeng ti maysa a motorsiklo iti asidegda. Kalpasan ti maysa nga oras, nagsardeng ti maysa nga owner type jeep, bimmaba ti drayber, pinaturonganna ti biktima iti paltog idinto nga indeklarana ti hold-ap, sana pinaiyawat ti petaka ti biktima a naglaon iti P5,000 ken ti selponna nga aggatad iti P16,000.

Innala met ti sabali a lalaki a naglugan iti motorsiklo ti back pack ti biktima a naglaon iti raincoat, log book, plastic water container ken sinelas sakbay a naglibasda iti abagatan a direksion.

Kinamat dagiti nagresponde a polis nga indauluan ni PSI Alexander Aurelio dagiti suspek ket natiliwda ni Quilala a nangmaneho iti dyipna.

Iti pannakaisurat daytoy, madama ti pannakabirbirok dagiti sabali pay a kadua ti suspek.#