Footer

Balediktorian iti PMA, kasapulanna ti tulong

STO. DOMINGO, Ilocos Sur  – Nagtignay ti sangguniang bayan ditoy para iti pannakatulong, saan laeng a pinansial no di pay ispiritual ken moral, iti maysa a tubo ditoy a nagbalediktorian iti Philippine Military Academy.

Nangipasa ti konseho ditoy iti maysa a resolusion nga   inyendorso ken pinutar ni Konsehal Denver Alvarado para iti panagtitinnulong ti kaadduan para iti pannakapaadda iti gatad a kasapulan ni 2nd Lt. Ariel Toledo iti pannakayospitalna gapu iti sakit a sagsagabaenna.

Cholangiocarcinoma  wenno cancer of the bile duct ti sakit ni Toledo ket kasapulanna ti dakkel a gatad  a gastuenna iti ospital.

Nagturpos idi 2006 ni Toledo a balediktorian iti Philippine Military Academy (PMA) iti klaseda a Mandirigmang Dangal ng Lahi.

Gapu iti panagturposna a kangatuan iti klaseda ken panangitag-ayna iti ilina, pinadayawan ti gobierno munisipal ditoy ni Toledo.

Ngem kalpasan ti panagturposna, naidalit ni Toledo iti sakitna a Cholangiocarcinoma ket nayospital.

Kinuna ti pamilia ni Toledo a dida kabaelan a patauden ti P4 milion a kasapulanna iti panagpaagasna iti ospital no di babaen ti suporta dagiti kaklasean, gagayyem, opisial ti gobierno ken kaam-ammoda tapno masalbar ti biagna. #