Footer

Bales ti nakaparsuaan (Tuloyna)

No palausen ti manarita, ti met laeng tao ti nangparnuay iti daytoy kadakkelan ita a parikut ti sangalubongan. Adda pagsasao: no ania ti imulam isu ti apitem. Inabuso ti tao ti nakaparsuaan. Saan ngarud a nakakaskasdaaw nga agibales met ti nakaparsuaan. Ti tao met laeng ti agsagrap kadagiti didigra ken lunod iti panagibales itan ti nakaparsuaan.

Pagarigan laengen dagiti kabakiran, adun ti nakalbo gapu iti awan sarday a panagpukan kadagiti kayo a pagsungrod, pagaramid iti alikamen, pagpatakder iti balay ken dadduma pay a kasapulan ti agdama a panagbiag. Dagiti kayo ti “mangsul-oy” iti carbon dioxide a patauden dagiti mapuoran a banag. Naduktalan a 55% iti makunkuna a green house gases iti tangatang ket buklen ti carbon dioxide. Addan 25% a ngimmatuan ti carbon dioxide no maidilig iti 200 a tawenen ti napalabas.

Sabali laeng ti chloroflourocarbon (CFC), methane ken nitrous oxide, Agtaud dagitoy iti singaw iti kemika, repriheratura ken ramramit a pagpalamiis, dagiti asuk manipud kadagiti paktoria, sasakayan ken dadduma pay a pagpartuatan, singaw ti abuno, panagpuor kadagiti rugit ti ayup ken pagsungrod manipud kadagiti nagrupsa a bambanag. Buklen ti CFC ti 24% idinto a 6% met ti nitrous oxide ken greenhouse gases.

No agtuloy  ti panagadu dagitoy a gases iti tangatang, saan a malapdan ti ipupudot ti lubong, kinuna ti Greenpeace.

Ania ngarud ti aramiden tapno malapdan wenno mapabassit ti agtultuloy a panagbara?

1. Panagaramat koma dagiti industrialisado a nasion iti salaknib kadagiti makina, ramramit ken alikamen a mangpabassit iti asuk a mangted iti polusion iti tangatang.

2. Pannakapasardeng iti panagaramat iti dinamita, sabidong ken kemika iti panagkalap iti baybay tapno di mairamraman a matay dagiti babassit nga ikan ken pannakadadael dagiti koral a pagitlogan ken pagtaenganda.

3. Pannakalapped ti pannakaabuso iti nakaparsuaan kas iti panagpukan iti kayo, panagminas ken panagibelleng kadagiti toxic waste kadagiti baybay ken karayan.

4. Panagtinnulong dagiti umili ken turayen a mangsaluad iti enerhia ken nakaparsuaan.

5. Panangited dagiti nabaknang a pagilian iti suporta ken tulong para iti pinansial ken pannakaidur-as ti teknolohia a mangsaluad iti aglawlaw.

Ngem kadagiti napalabas a taripnong dagiti pagilian, mapaliiw nga awan ti magudilanda tapno masolbar ti problema ti ibabara ti lubong gapu iti kakurang ti pannakikooperar dagiti industrialisado a pagilian.

Kabayatanna, agtultuloy ti ibabara ti lubong ket mariknatayon dagiti dakes nga epektona a pakaparnuayan dagiti narungrungsot a bagyo, tikag, layus, itataud dagiti sakit iti kudil ken iti pannakaungaw dagiti nabiag kadagiti kabakiran ken kabaybayan a dida kabaelan ti panagbaliw ti klima ken aglawlaw.

Iti nalawlawag a pannao, gapu iti saan a pannakaitaltalek daytoy a problema, agturturong ti Ina a Daga iti panungpalan a pakairamanan dagiti tattao nga agindeg ditoy. Saanen a posibilidad laeng daytoy no di agdadata a kinapudno nga uray dagiti sientista ket saandan a mabalin a paglibakan wenno yaleng-aleng laeng.#