Balikatan Exercises, matuloy a maiwayat iti Ilocos Sur

VIGAN CITY- Matuloy ti Balikatan Exercises ditoy Ilocos Sur, segun ken ni Deputy National Security Adviser Luis “Chavit” Singson.

Kinuna ni Singson a nakapatangnan ni US Ambassador to the Philippines Kristie Kenney a matuloy a matuloy ti Balikatan Exercises a maangay iti Ilocos Sur intono umay a tawen.

Innayon ti dati a gobernador a madama ti konsultasion no kayat dagiti umili a maisayangkat ti interemente a grupo dagiti soldado nga Amerikano iti combat operation iti probinsia.

“Napimpintas no umayda amin, ad-adu ti maitedda a tulongda… ad-adu dagiti turista, ad-adu dagiti makipartisipar, ad-adu ti makanda, diay domino effectna, napimpintas a mangbatir iti ekomomiatayo,” kinuna ni Singson.

Inlawlawag ti undersecretary nga iti babaen ti Balikatan Exercises, umay la dagiti soldado agmedikal, agtarimaan ti kalsada, eskuela ken dadduma pay.

Kinuna ni Singson nga iti Abagatan ti masansan nga nangisayangkatan dagiti soldado nga Amerikano iti Balikatan Exercises ket dinawatna nga umayda met iti Amianan a Luzon.

“Dakkel a banag ti yaayda ditoy,” kinuna ni Singson sana inyunay-unay nga adu a pagimbagan ti maited ti Balikatan Exercises iti probinsia.

Kabayatanna, kinuna ti dati a gobernador nga awan pay ti desision no asino ti suportaranda para iti kinapresidente inton eleksion 2010.

Segun ken ni Singson, tallo ti pagpilpilianda kadagiti agkandidato a para iti kinapresidente, da Sen. Benigno “Noynoy” Aquino, Sen. Manny Villar ken ni dati a Defense Secretary Gilberto Teodoro.

Kumandidato ni Aquino iti babaen ti Liberal Party, ni Villar iti babaen ti Nacionalista Party, ken ni Teodoro iti babaen ti Lakas-Kampi-CMD.

Kinuna ni Singson nga urayenna ti resulta ti konsultasion kadagiti nadumaduma nga ili no asino ti suportaranda a kandidato.

“Kayatko a suroten ti kapanunotan ti kaaduan,” kinuna ni Singson.#