Footer

Balikbayan, biniktima ti Budol-Budol Gang

VIGAN CITY – Nangbiktima manen ti Budol-Budol Gang ket maysa a balasang a balikbayan ti naallilawda itay nabiit a nakapukawan daytoy iti kuarta ken alahasna.

Nagreport iti polis ditoy siudad ni Arlyn Tubon, 24, balasang, balikbayan manipud iti California, USA, taga-Sto. Domingo, Ilocos Sur a biniktima ti dua a babai a masikog ti maysa ket intaray dagitoy ti kuartana a P34,000 ken alahasna nga agpateg iti P30,000.

Segun ken ni Tubon, inasitgan ti maysa a babai nga atiddog ti buokna bayat ti kaaddana iti Plaza Maestro ket nagsaludsod kenkuana no adda am-ammona nga obe-gyne nga agik-ikkat iti sikog.

Intudo ti babai ti maysa a masikog a kinunana a mangisalsalda iti alahasna nga agpateg iti P160,000 tapno adda gastuenna nga agpaikkat iti sikogna.

Kinuna ni Tubon nga inawis ti babai a tulonganda ti masikog babaen ti panangsaldada iti alahas daytoy.

Kinuna ti balikbayan a kasla nahipnotismo iti kinasam-it ti panagpatpatang ti babai ket naallukoy a simmurot kadagiti dua iti nalinged a disso tapno kitaenna dagiti alahas nga isalsalda ti masikog.

Iti katedral ti Vigan ti nagsaltekanda ket ditoy nga impakita ti masikog dagiti alahasna iti biktima.

Kinuna ni Tubon nga iti Plaza Burgos ti nagiinnallawatanda ket intedna ti kuartana a P34,000 ken pendantna nga agpateg iti P30,000 kas sukat dagiti alahas ti masikog.

Naammuan laengen ni Tubon a peke dagiti alahas nga imbati dagiti dua a babbai idi napanna pinaamiris iti maysa a pagsaldaan ditoy Vigan.

Dagus a nagpatulong ti balikbayan iti polis ditoy siudad ket nagsawarda iti aglawlaw ti Vigan ngem saandan a nakita pay dagiti dua a suspetsa.

Iti kallabes, addan dagiti nabiktima ti Budol-Budol Gang ditoy siudad a dua a babai dagiti maitudtudo a suspetsa.#