STO. DOMINGO, Ilocos Sur – Awan pay ti nangtunton iti motorsiklo nga imbati dagiti naghold-ap iti agkabbalay iti kamposanto iti daytoy nga ili.

Kuna ti polis ditoy a posible a tinakaw dagiti hold-aper ti TMX 155 a motorsiklo ket inaramatda laeng para iti panaghold-up kadagiti live-in partners a nainaganan a Felicidad Cabbab, taga-Villaviciosa, Abra, balikbayan, ken ni Lorenzo Alcantara, taga Naglaoaan, ditoy.

Segun iti report, nagturong dagiti dua iti kamposanto ditoy ket tinugkelanda iti kandela ti tanem ti maysa a kabagian ni Alcantara.

Idi agawid dagiti dua, kellaat a nagbalangan ti dua a lalaki ket pinaturonganda dagiti biktima iti paltog.

Kinasakas dagiti di pay nabigbig a suspetsa ti kuarta ti balikbayan a Hongkong dollars a di pay ammo ti dagupda, alahas, cellular phones, diaket, ken sunglasses.

Imbati dagiti suspetsa ti motorsikloda a TMX 155 ket  intarayda ti kabarbaro nga XRM a motorsiklo iti panaglibasda.

Madama ti panagpalutpot ti polis para iti pannakasolbar ti nasao a panaghold-ap.