Balikbayan, kasakayna, dinungpar ti bus, agpada a natay

SAN NICOLAS, Ilocos Norte – Saanen a naiyabot iti ospital ti biag ti maysa a balikbayan ken ti kinasakayna iti motorsiklo kalpasan ti panangdungpar kadakuada ti maysa a bus iti kalsada nasional a sakup daytoy nga ili.

Nainaganan dagiti biktima a da Marcel Ramos, balikbayan a tubo ti Barangay Calambeg, Piddig, Ilocos Norte ken ti kinasakayna a ni Maricar Gaoiran, saleslady ken residente iti Barangay Madiladig, Laoag City.

Segun iti inisial nga inbestigasion dagiti polis, inobertekan ti Farinas Bus a minaneho ni Columbus Queja, residente iti Batac, Ilocos Norte, ti maysa a dyip ket dinungparna ti makasabatna a motorsiklo a nagluganan dagiti biktima.

Naideklara dagiti biktima a natayen idi maidanonda iti ospital.

Birbiroken dagiti polis ti drayber ti bus a naglibas kalpasan ti pannungpar.#