Balikbayan, nasipdutan iti kuarta

VIGAN CITY – Nasipdutan iti kuarta ti maysa a turista bayat ti kaaddana iti maysa a panganan iti Plaza Maestro, Barangay 1 ditoy siudad idi malem ti Mayo 14.

Nagpulong iti polis ni Ronald Alviz Sarmiento, 63, naasawaan, ken residente iti Camen Ville, Henson Avenue, Angeles City, Pampanga, a nasipdut ti petakana a naglaon iti kuarta bayat ti kaaddana iti Chowking a masarakan iti Plaza Maestro idi agarup 1:15 ti malem ti nadakamat a petsa.

Kinuna ni Alviz nga agdagup iti $1,000 ken P5,000.00 ti naggian iti petakana a suspetsana a nasipdut bayat ti pannakiliniana iti counter ti nasao nga establisimiento.

Suspetsa ni Alviz a ti grupo dagiti babbai nga adda iti likudanna bayat ti pannakiliniana ti nangdukot iti petakana.

Idi naipakita ken ni Alviz ti CCTV recording, binigbigna ti maysa nga Estrella Basuil, residente iti Barangay Pug-os, Cabugao, Ilocos Sur.

Nagsawar dagiti polis ngem saanda a nasapulan ti suspek.#