Footer

Ballaag ti LTFRB: mamulta, drayber nga aglabsing iti fare rollback

SAN FERNANDO CITY – Imballaag ti Land Transportation Franchise Regulatory Board (LTFRB) ditoy rehion ti panangsurot dagiti drayber iti fare rollback a nangrugi a maipatungpal itay Disiembre 15 daytoy a tawen.

Kinuna ni Atty. Annibela Nullar, hearing officer ti LTFRB regional office a makasuan wenno mamulta dagiti drayber dagiti pampasahero a lugan a saan nga agtungpal iti provisionary fare rollback nga impaulog ti opisinada.

Imbilin ti LTFRB ti fare rollback gapu iti petision ti grupo ken commuters a maipababa ti plete  gapu iti nagsasaganad a panagpababa ti presio ti gasolina iti world market.

Nangrugi itay Disiembre 15, naikkatan iti P.50 ti  plete para kadagiti para pasahero a dyip ket nagbalinen a P7.50 manipud iti P8 para iti umuna nga uppat a kilometro ken naikkatan iti P.10 ti dati a P1.50 a  kanayonan a plete kadagiti sumarsaruno a kilometro.

Naikkatan met iti P.50 iti P9.00 a plete kadagiti bus ket nagbalin a P8.50 para iti umuna a lima a kilometro ken kanayonan a P1.85 kadagiti sumarsaruno a kilometro.

Segun iti LTFRB, temporario a naikkat ti P10 a “mandatory tip” kadagiti taksi iti las-ud ti tallo a bulan.

Nagbalin met a P6.00 ti minimum a plete kadagiti estudiante, senior citizens ken addaan rangkap.

Iti interbiona iti media, imballaag  ni Thompson Lantion, hepe ti LTFRB, ti panagtungpal dagiti drayber iti fare rollback tapno saanda a mapagmulta.

Segun ken ni Lantion, mamulta dagiti damoda ti aglabsing iti P3,000; maikadua a panaglabsing, P4,000; maikatlo a panaglabsing, P5,000.

Kinuna pay ni Lantion a masapul a masurot ti 20% discount para kadagiti senior citizens ken estudiante.

Innayon ni Lantion a masuspenso ti CTC ti drayber iti maikapat a panaglabsing ken makanselan ti prangkisa iti maikalima a panagsalungasing.

Kabayatanna, kinuna ni Nullar a masapul nga adda provisional fare guide a maipaskil kadagiti lugan tapno maammuan dagiti agbibiahe iti umisu a pleteda.

Innayon ni Nullar a nainget nga imonitor ti opisinada no maipatpatungpal met laeng ti fare rollback kadagiti dyipan ken bus.

Temporario ti implementasion daytoy a fare rollback ket agpatingga iti Marso 15, 2009. Maisayangkatto ti maysa a hearing iti inton Pebrero no umay a tawen no mapagbalin a permanente ti fare rollback.#