Footer

Balo, binagsol ti kabsatna a balo

BANTAY, Ilocos Sur – Dati a susik ti mapapati a nangbagsolan ti maysa a lalaki iti kabsatna sadiay Barangay Aggay, Cabaroan ditoy nga ili idi rabii ti Septiembre 8.

Naiyospital ni Mario Sipin y Ragini, 65, balo, gapu iti panangbagsol kenkuana ni Victor Alfredo Sipin, Jr. y Ragini, 60, balo, agpada a residente iti nadakamat a barangay.

Iti inisial nga inbestigasion dagiti polis, agbuybuya iti TV ti biktima ken tallo a kaarrubada iti family houseda idi simmangpet ti suspek a nakainom sa nagprobokar.

Iniddep ni Mario ti TV sada pimmanaw nga agkakadua ngem mapapati a nangala ni Victor iti Swiss knife ken bikal sana kinamat ti kabsatna ket naggubalda iti ruar ti balay.

Binagsol ti suspek ti biktima ket nasugatan ti makannawan a gurong daytoy. Naagaw ti biktima ti bikal ket daytoy ti imbasnotna iti nadumaduma a paset ti bagi ken ulo ti suspek.

Nagresponde dagiti barangay tanod ket inanawada ti suspek ket idi simmangpet dagiti polis, impanda daytoy iti police station idinto a naitaray met ti biktima iti Gabriela Silang General Hospital para iti pannakaagas dagiti sugatna.

Di nailanad iti blotter no ania ti saan a nagkinnaawatan dagiti agkabsat.#