Balo, binagsolna ti kinainomna

STA. CRUZ, Ilocos Sur – Nagpulong iti polis ti maysa nga aglaklako iti lames a binagsol ti kalugaranda ti asawana bayat ti panaginomda idi malem ti Abril 17.

Intudo ni Godobreda Alnaez y Quizon, 51, naasawaan, fish vendor, ken residente iti Barangay Las-ud ditoy nga ili ni Juan Agader, Sr., balo, kalugaranda, a nangbagsol iti lakayna a ni Leonardo Alnaez y Rabino, 56.

Boluntario a simmuko ti suspek a kinuyog ti anakna a ni Melandro Agader.

Segun iti panagimbestiga dagiti polis, naggiinom ti biktima, suspek ken maysa a di nainaganan a kaduada iti balay ti suspek ket mapapati nga inakusar ti suspek nga adda dakes a panggep dagiti kinainomna, isu a binagsolna ti biktima a nagsagrapan daytoy iti sugat iti tian.

Naitaray ti biktima iti Sta. Lucia District Hospital sa naiyalis iti Candon General Hospital. Naipan met ti suspek iti Sta. Lucia District Hospital para iti medikal a pannakaeksamenna.

Nakarekobre dagiti polis iti patadem nga agatiddog iti sumurok-kumurang 11 a pulgada iti crime scene.#