Balo, ginudas lallaki a riding in tandem

STO. DOMINGO, Ilocos Sur – Makalawas kalpasan ti pannakaipakat ti gun ban iti sibubukel a probinsia maigapu iti maangay nga special elections para iti nabakante a puesto ti diputado iti umuna a distrito, maysa a residente ditoy nga ili ti pinapatay dagiti armado a tattao a riding in tandem.

Nainaganan ti biktima ti pammapatay a ni Eleuterio Tubon y Tubon, 59, balo ken residente iti Barangay Napo ditoy nga ili.

Kanaig daytoy, imbilin ni OIC Provincial Director Police Senior Supt. Reynante Partible ti panangisubmite ti hepe ti polis ditoy nga ili iti progress report mainaig iti nasao a pammapatay.

Iti inisial nga inbestigasion dagiti nagresponde a polis, agdaldaliasat nga agpaamianan ti Bonus X a motorsiklo a minaneho ni Tubon, kaluganna ni Luzviminda Pamo, live-in partnerna, ket idi makadanonda iti Barangay Parada, immabay ti Euro motorcycle a kolor asul ket pinaltogan ti maysa kadagiti naglugan ti ulo ti biktima.

Nagderetso ti motorsiklo iti dayaen nga abaga ti kalsada sa naikras a naikras a nakadunoran ti makannigid nga ima ni Pamo.

Naglibas dagiti suspek a nagpaamianan kalpasan ti pammaltog ket saanen a na-sarakan idan dagiti nagresponde a polis.

Naitaray da Tubon ken Pamo iti Tolentino clinic & Hospital ngem naideklara nga awanen ti biag ni Tubon.

Nakarekobre dagiti inbestigador iti uppat a kapsula a nagtaud iti cal. 45 iti nakapasamakan ti krimen.

Adda iti babaen ti gun ban ti  sibubukel a probinsia gapu iti maangay nga special elections a pakabutosan ti diputado iti umuna a distrito.#