VIGAN CITY – Maysa a balo nga agtawen iti setenta y sais ti nagpulong iti estasion ti polis ditoy siudad a nabiktima ti Budol-budol Gang idi malem ti Nobiembre 25.
Idi agarup 4:30 ti malem ti nadakamat a petsa, nagreport iti polis ni Marta Fontanilla Paet, 76, residente iti Barangay Paing, Bantay, Ilocos Sur, a nagbalin a biktima ti dua a babai a masuspetsa a kameng ti Budol-budol Gang bayat ti kaaddada ken maysa a Flordeliza Posadas y Paet, 51, kalugaranna, iti Puregold Supermarket a masarakan iti Barangay VIII, ditoy siudad.
Iti panangisalaysay ni Fontanilla, inasitgan ida ti maysa a babai ket imbagana a kinaklaseanna ti anakna a babai.
Madamdama, immasideg ti sabali a babai a nagkiddaw iti tulong ket inallukoy dagiti dua ti baket a mangiruar iti kuartana iti BDO Bank a masarakan iti Quezon Aveune, kas kasukat iti doliar nga intanggaya dagiti suspek.
Inlugan dagiti suspek ni Fontanilla ken ni Posadas iti puraw a kotse sada napan iti nasao a bangko a nangiruaran ti biktima iti P90,000.00.
Inkabil ni Fontanilla ti kuarta iti uneg ti bag agraman ti paris nga aritos, singsing, ken P9,000.00.
Inyawat dagiti suspek ken ni Fontanilla ti sabali a bag a kunada a naggianan dagiti doliar sada indissaag ti biktima ken ti kaduana iti sango ti Newborn Hardware.
Naladawen idi nasukalan ni Fontanilla nga inallilaw dagiti dua a babbai ket nupay inreportna ti napasamak iti polis, saanen a nasapulan dagiti otoridad dagiti suspek.#