Footer

Balo, kinabil ti anakna a guardia, natay

SINAIT, Ilocos Sur – Awanen ti biag ti maysa a balo idi maidanon iti ospital kalpasan a kinabil ti anakna iti pagtaenganda sadiay Barangay Purag, ditoy nga ili idi malem ti Mayo 18.

Indeklara ti doktor a nangtaming kenkuana a dead on arrival iti Corpuz Clinic and Hospital ni Elpidio Yadao y Ines, 85, balo, gapu kadagiti nakaro a dunorna iti ulo ken nadumaduma a paset ti bagina gapu iti panangkabil kenkuana ti anakna a ni Nestor Yadao y Yapit, 50, naasawaan, security guard.

Gapu iti daytoy, naisaklang ti kaso a parricide maikontra iti suspek iti opisina ti provincial prosecutor iti Vigan City idi Mayo 19.

Kas maibatay iti report ni Barangay Captain Reynaldo Abella idi agarup 4:40 ti nadakamat a petsa, adda ni Elpidio iti terasa idi simmangpet ti suspek nga adda iti inpluensia ti arak ket kinabilna ti amana.

Iti panagimbestiga dagiti polis, nakarekobreda iti crime scene iti tallo a dadakkel a bato a maipagarup nga inusar ti suspek a nangkabil iti amana.#