Balo, naaresto gapu iti illegal a panagrekrut

SAN JUAN, Ilocos Sur –  Inaresto ti nagtipon nga elemento ti PIB, Ilocos Sur Provincial Police Office ken San Juan Police Station ditoy ti maysa a babai nga adda kasona iti korte idi agsapa ti Agosto 26.

Inaresto dagiti polis ni Noemi Sablay y Yadao, 54, balo, residente iti Barangay Bacsil, ditoy nga ili gapu iti kasona nga illegal a panagrekrut.

Pinirmaan ni Judge Marita Balloguing ti Regional Trial Court Branch 20, Vigan City ti warrant of arrest maikontra ken ni Sablay, akusado iti large scale illegal recruitment a naipababaen iti Criminal Case No. 8072-V.

Naipaeksamen nga umuna ni Sablay iti Rural Health Unit ti San Juan  sa naipan iti San Juan Police Station para iti dokumentasion sakbay a naipaima iti maseknan a korte.

Awan ti nairekomenda a piansa ni Sablay para iti temporario a wayawayana.#