Balo, nagandat ti biagna

STA. CRUZ, Ilocos Sur – Sinerrek ti dua a tattao ti maysa a balay iti Barangay Besalan ditoy nga ili ket mapapati a ginandatda a papatayen ti akimbalay.

Naitaray iti Sta. Lucia District Hospital ni Rosita Haduca y Abella, 68, balo, residente iti nasao a barangay gapu iti sugatna gapuanan ti pannakapalekna.

Segun iti report, agarup alas tres iti parbangon ti Nobiembre 6 idi nangeg da Samuel Haduca y Abella, 47, mannalon ken ti asawana ti inada a Rosita nga agpapaarayat ket nadatnganda daytoy a nakatugaw iti katrena a daradara ti kawesna.

Naammuanda a dua a tattao ti simrek iti balay ti baket ngem nakariing daytoy ket pinalekda iti natangken a banag. Nupay kasta, nakapagpukkaw ti baket a nakalukagan da Samuel.

Nagpaarayat da Samuel kadagiti kaarrubada ket nagsawarda iti aglawlaw ngem nakalibas dagiti di nabigbig a nakabonite a suspek.

Di pay ammo ti motibo ti insidente.#