Balo, nasarakan a nakabitin iti uneg ti balayna

CANDON CITY – Depression ti mapapati a nangiduron nga agbekkel ti maysa a balo nga agnaed sadiay Barangay Allangigan 2nd, ditoy a siudad.

Mismo a ti pito ti tawenna nga anak ti biktima ti nakakita ken ni Alfredo Garringo Jr., y Dario, 31, a nakabitin iti uneg ti balayda, partikular iti asideg ti ridaw, idi agarup 6:30 ti bigat ti Mayo 18.

Idi naammuanna, dinagdagus ni Estafania Garringo, ina ni Garringo, ti simrek ket pinutedna ti tali sa nagpaarayat kadagiti kaarrubada. Ngem nasikkilen ti bangkay a mapapati a nagbekkel maysan nga aldaw sakbayna.

Iti panagimbestiga ti SOCO team, awan ti pakakitaan a puersado a naserrek ti balay ken awan ti senial nga adda foul play.
Kuna ni Estafania a depressed ti anakna ket daytoy ti mapapati a nakagapu ti panagbekkelna. Ngem saan a nailanad iti blotter no ania ti puon ti pakalidlidayan ti biktima.#