Balo, nasarakan a naitanem

SANTIAGO, Ilocos Sur – Siasino dagiti nangpatay ken nangitanem iti maysa a balo iti kabakiran a dayaen a paset ti kalapawna sadiay Barangay Mambug ditoy nga ili a masuspetsa a napasamak idi aldaw ti Septiembre 24?

Nasurok makalawas kalpasan ti pannakaireportna, awan pay ti suspetsa ti kapolisan ditoy a nangisayangkat iti krimen.

Nupay kasta, kinuna dagiti polis nga agtultuloy ti panagimbestiga tapno maammuan ti kinasiasino dagiti kriminal.

Kas maibatay iti police blotter, napan sinarungkaran ni Peregrino Locquiao y Manuel, 80, balo, ti bangkagna idi agarup 8:20 ti agsapa ti Septiembre 24 ngem saan a naggawid agingga iti kabigatanna isu a napan sinapul ti pamiliana.

Nasarakanda ti lakay a naikali iti dayaen a paset ti kalapawna a nagalutan nga agpada dagiti imana iti lanut ken tape.

Idi iyaon dagiti nagresponde a polis ti bangkay, naduktalanda a nakagalut pay dagiti sakana ken naparautan ti ngiwatna iti tape.

Nakarekobre pay dagiti inbestigador iti bikal a mapapati nga inaramat dagiti kriminal a pinangbagsol iti biktima a nagsagrapanna iti dunor iti makannigid nga abagana a mapapati a puon ti nakatayanna.

Nagpatulongen ti kapolisan ti Santiago iti tulong manipud iti SOCO team ti Candon City Crime Laboratory Office para iti pannakaproseso iti crime scene.

Mayur-uray met ti resulta ti pannakaautopsia ti bangkay ti biktima.#