Balo, natay gapu iti pasarabo

BANTAY, Ilocos Sur – Mapan koma gumatang ti biktima iti bibingka nga ipasarabona ngem saannan a maited pay iti pakaisangratanna agsipud ta dimteng ti trahedia a nangkeltay iti biag ti biktima.

Pimmusay ni Alejandra Rayray, 74, balo, residente iti Tondo, Manila iti ospital a nakaitarayanna gapu iti grabe a sugat a sinagrapna kalpasan ti panangdungpar kenkuana ti maysa a van.

Simmuko ti nagmaneho iti Mitsubishi Delica van a ni Mario Paranada, 38, residente iti Barangay Taleb ditoy kalpasan a naitarayna ti baket iti ospital.

Naammuan iti inbestigasion dagiti polis ditoy nga agdaldaliasat ni Paranada nga agpalaud iti kalsada nasional a sakup ti Barangay Naguiddayan ditoy nga ili ket idi makabatog iti The Sisters Royal Bibingka, dimsaag ti biktima iti naglugananna a Maria de Leon sa kellaat a bimmallasiw iti kalsada a puon ti nakadungparanna.

Intaray ni Paranada ti biktima iti MetroVigan Cooperative Hospital ngem nagsat ti anges ti baket bayat ti pannakataming dagiti sugatna.#