Balo, tinakawan 5 armado a lallaki a nakauniporme

NARVACAN, Ilocos Sur – Lima nga armado a lallaki a nakaaruat iti camouflage uniform ken nakabonite ti nangserrek iti maysa a pagtaengan iti Sitio Limmansangan, Margaay ditoy idi sardam ti Mayo 18 ket kinasakasda dagiti paltog, alahas ken kuarta dagiti bumalay.

Inreport ni Leonida Corpuz y Caballes, 67, balo, ken residente iti nadakamat a sitio, ti nasao a panagtakaw iti polis ditoy idi agsapa ti Mayo 19.

Kinuna ni Corpuz a lima a lallaki nga armado iti short ken long firearms ken nakaaruat iti camouflage uniform ti nangserrek iti pagtaenganda.  Ngem segun iti biktima, dida nabigbig dagiti suspek gapu ta nakaaruatda iti bonite.

Iti inisial nga inbestigasion dagiti nagresponde a polis, agin-inana ni John Corpuz y Caballes, 38, naasawaan, ken residente iti nadakamat a lugar, iti piggery iti likudan ti balay  idi kellaat a nagparang dagiti suspek, pinaturonganda iti paltog, imbilinda ti panagpaklebna iti daga sada pinungo babaen ti tali.

Kalpasanna, simrek dagiti suspek iti balay babaen ti akinlikud a ridaw sada pinungo dagiti dadduma pay a bumalay babaen ti tali ken barut, malaksid ni Corpuz.

Kinasakas dagiti mannanakaw ti maysa a 12 gauge shotgun nga addaan SN 52458 ken firearms license number 8735110310779 a nakarehistro iti nagan ni   Leonida Corpuz; maysa a paltog nga addaan license number 103289612164345 a nairehistro iti nagan ni John Corpuz; assorted nga alahas a di pay ammo ti balorda; 3 a selpon; maysa a handheld radio; ken cash money nga agdagup iti sumurok kumurang P270,000.00.

Naglibas dagiti suspek iti saan nga ammo a direksion kalpasan ti panagtakaw.

Madama ti panagisayangkat dagiti polis iti inbestigasion mainaig iti nasao a panagtakaw.#