Footer

Balud, mairamandan a miembro iti PhilHealth

VIGAN CITY – Maragsakan dagiti balud iti provincial jail iti pannakairamandan nga agbalin a miembro ti PhilHealth.

Inaprobaran itay nabiit ti provincial board daytoy pinutar ni  Vice Gov. Deogracias Victor Savellano nga automatiko a pannakairaman dagiti balud iti provincial jail nga agbalin a miembro ti PhilHealth.

Kinuna ni Provincial Jail Warden Vicente Amistad a dakkel a tulong ti gobierno probinsial daytoy kadagiti balud agsipud ta iti panagbalinda a miembro ti PhilHealth adda aramatenda no agsakitda ken maiyospitalda.

Segun ken ni Amistad, adda it-ited ti gobierno probinsial nga agas para kadagiti agsakit a balud, ket no nakaro ti sakit ti balud, itarayda iti ospital nupay maiparit koma agsipud ta taoda met ken adda met riknada a mangbanbantay kadakuada.

Ituding ti linteg a kasapulan ti pammalubos manipud iti korte no mairuar ti maysa a balud.#