Footer

Bamboo craft manufacturers, saan koma nga agdepende iti LGU: Cabugao mayor

CABUGAO, Ilocos Sur – Indagadag ti mayor ditoy nga ili nga agtultuloy latta dagiti bamboo crafts manufacturers nga agaramid kadagiti produktoda a saan ketdi nga agdependeda lattan iti pondo a maited ti lokal a gobierno kadakuada.

Kinuna ni Mayor Dio Caesar Suero nga iti nasurok lima a tawenen a panangitandudo daytoy nga ili kadagiti agduduma a kasangkapan a naaramid manipud iti kawayan kas One Town One Product, kapaliiwanna nga awan ti sustainability daytoy.

“Panay rugi. No naibusen ti naited a kapital, agsardengda metten nga agaramid iti alikamen,” kinuna ni Suero idinto nga inyunay-unayna a  masapul nga aramiden met dagiti bamboo crafts manufacturers ti pasetda tapno agtuloy ti industria,.

Kinuna ti mayor a malaksid iti kuarta, adda payen makinaria nga aramaten dagiti bamboo craft makers ken nangisayangkatda payen iti sumagmamano a product development training tapno sumayaat ti kalidad dagiti aramidda.

Innayonna nga inrugi pay ti lokal a gobierno ditoy ti nagpamula kadagiti kawayan kadagiti igid ti karayan tapno saan a maawanan iti raw materials dagiti manufacturers.

“Saanen nga uso ita ti dole-out gapu ta imbes nga agsalukag ti maikkan, kasungani met ti maar-aramid isu a counterparting scheme itan ti ipagpagna ti gobierno,”innayon pay ti mayor.#