Banayoyo, sinarungkaran ti KABSAT

BANAYOYO, Ilocos Sur – Nadumaduma a katulongan iti talon, dingnguen ken  serbisio ti naipaay kadagiti residente ditoy iti naisayangkat a maikalima a bansada ti Kakailian nga Agnaed iti Barangay Sangsangkamaysa nga Agrang-ay Tayo (KABSAT) Outreach Program idi Marso 17.

Naiwaras kadagiti umili  dagiti agduduma a masapul iti talon kas iti water pumps, hose, tubo para iti shallow tube wells, kuliglig, water tanks, knapsack sprayer grass cutters, bin-i a high breed rice ken mais, agduduma a high breed a bukbukel, seedlings ti mangga, upgraded a kalding ken Sasso a manok kasta pay dagiti monobloc a lamisaan ken tugtugaw, tents, pannakasimpa ti dalan ken ti P12,000 ti gatadna a tseke  kas barangay assistance tunggal maysa iti 14 a barangay ti ili.

Nairugi pay ditoy ti baro a DVBS program ti gobernador para ti pannakadiskobre kadagiti potensial a blood donors nga inawaganna iti Dara Voluntaryo nga ited Biag Salbarentayo. Saan met a naawan ti medical-dental mission, kasta met a binagi latta ti MFLM Madrigal Foundation ti libre nga agas ken bitamina a naiwaras bayat ti programa.

 Kanaig daytoy, nagyaman ti kapitan ti Barangay Montero  gapu ta ti barangayda ti napili ti gobierno probinsial nga idadauluan ni Gov. Deogracias Victor “DV” Savellano nga ipaayan iti tulong, ken  pannakaiyasideg iti lugarda dagiti serbisio iti laeng kapitolio a maproseso.

“Nagdakkel a banag nga itoy a nasulinek a lugar ti inuna ni Gob. DV a pangipaayan iti tulong,” inyebkas ti kapitan.

Kinuna met ni ABC Federated President Ferdinand Banua a dakkel ti maitulong daytoy a pet project ni Savellano kadagiti umili ditoy, nangruna la unay iti benneg ti agrikultura. (Manciellito S. Tacadena/NBN Vigan)