STA. MARIA, Ilocos Sur – Maysa a bangkay ti lalaki a nauram ti nasarakan iti sementario ditoy nga ili.
Binigbig ti amana a ti anakna a ni Rey Cuaresma, 19, residente iti Libtong, Tagudin, Ilocos Sur ti bangkay a nasarakan iti sementerio ditoy.
Segun iti amana, sumagmamanon nga aldaw a binirbirokda ti anakna ket nagpakuyog iti polis ti Tagudin idi nangegda ti flash report nga adda nasarakan a bangkay a nauram iti sementerio ditoy.
Mapapati a naudi a nakita a sibibiag ti biktima a magmagna nga agpaamianan iti nagbaetan ti Santiago ken San Esteban.
Pattapatta dagiti polis a sabali a lugar ti nakapapatayan ti biktima ket naibelleng ti bangkayna iti sementerio ta awan ti naguraman iti lugar a nakasarakan kenkuana.#
