Bangkay ti lalaki, nasarakan

SUYO, Ilocos Sur – Maysa a bangkay ti lalaki ti nasarakan iti rangkis sadiay Sitio Man-ubac, Barangay Man-atong, ditoy nga ili idi malem ti Marso 26.

Nasarakan a nakapakleb ti bangkay a nagsagrap kadagiti adu a sugat iti nadumaduma a paset ti bagina ken daradara ti ulona.

Nakaaruat ti bangkay iti nangisit a leather jacket, nangisit a nagkuelio a tisirt, nakapantalon iti maong ken leather top sider a sapatos.

Iti inisial a panagimbestiga dagiti polis babaen ti tulong ti SOCO a nakabase iti Candon City, narekobre iti bulsa ti biktima iti assorted items ken kuarta nga agdagup iti P4,190.00.

Iti pannakaisurat daytoy, saan pay nga ammo ti kinasiasino ti biktima a mapapati a biktima iti salvage.#