Bangkay ti naiyanud nga ubing, nasarakanen

BANTAY, Ilocos Sur – Nasarakan met laengen ti bangkay ti ubing a naireport a naiyanud iti pakyas idi agsapa ti Enero 15.

Nabigbig ti bangkay a ni Jake Vandam Pacursay y Liberato, agtawen iti dua, babaen met laeng ti inana a ni Madelyn Pacursa y Liberato, 24, ken residente iti Barangay Capangdanan ditoy nga ili.

Nasarakan ti bangkay ni Jake a tumtumpaw iti irigasion idi agarup 1:03 ti malem ti Enero 19.

Segun iti report, pinanawan ti ina ti anakna nga agay-ay-ayam iti sango ti balayda idi agarup 7:00 ti agsapa ti Enero 15 ngem idi nagsubli, dinan nabirokan pay ti anakna.

Mapapati a napan naggay-ayam ti ubing iti pakyas ngem naikaglis ken naiyanud a puon ti nakalmesanna.#