Bangkay ti nalmes, nasarakan

SAN ESTEBAN, Ilocos Sur – Nasarakan met laengen ti bangkay ti maysa kadagiti nalmes iti kabaybayan a sakup ti Barangay Bateria ditoy nga ili idi Disiembre 21 kalpasan ti maysa nga aldaw a pannakabirokna.

Timpaw ti bangkay ni Wilmer Disono, 27, baro, residente iti Barangay Dalit, Pilar, Abra, iti met laeng asideg ti limnedanna idi guyoden ti napigsa nga agus.

Napan inarayat ni Wilmer ti kabsatna a ni Leonard, 21, baro, idi inyagus daytoy ti dalluyon ngem nairaman a naguyod.

Immarayat dagiti lumugar ket naalawda ni Leonard ngem dida nasarakan ni Wilmer.

Segun iti inbestigasion ti polis, karaman dagiti agkabsat a napan nagpiknik iti igid ti baybay iti nadakamat nga ili idi Disiembre 20.

Timmapog ni Leonard iti baybay a naglugan iti rakit ket sinabuagan ti dalluyon a puon ti nakatnaganna iti danum.

Awanen ti biag ni Leonard idi maidanon iti ospital.#