Bangus-Dagupan maikkan iti tag

DAGUPAN – Tapno malapdan ti pannakailako dagiti bangus manipud iti sabali a lugar a kas bangus-Dagupan, maikkanen daytoy kangrunaan a produkto ditoy iti tag a mangipakaammo a sertipikado a bangus-Dagupan.

Inwayat daytoy ti gobierno ti siudad ditoy agsipud iti kaadda dagiti bangus a mailaklako a kas produkto ti Dagupan ngem naggapuda iti sabali a lugar.

Kinuna ni Agriculture Officer Emma Molina nga eksklusibo laeng a maikkan iti tag dagiti bangus a matartaraken iti Dagupan.

Kinuna ni Molina a nupay saan a mandatory a maikkan iti tag dagiti bangus a matartaraken iti Dagupan, maamiristo dagiti bangus growers a pagsayaatanda ti pannakaikabil iti tag kadagiti produktoda.

Kanaig daytoy, indagadag ni Molina ti panagaplikar dagiti bangus growers ken dealers iti akreditasion tapno maikkanda iti right nga aglako iti Dagupan certified bangus.#