Bangus fingerlings, naiwaras

VIGAN CITY – Nagiwaras ti city agriculture office kadagiti bangus fingerlings iti dua a barangay ditoy siudad idi Enero 24.

Kinuna ni City Agriculture Officer Teresita Raboy a naiwaras dagiti bangus fingerlings kadagiti barangay a naapektaran idi iti panagaluyo ti baybay maigapu iti bagyo.

Kinuna ni Raboy a 77 a mangngalap ti Barangay Mindoro ken Pantay Laud dagiti benepisario iti bangus fingerlings agsipud ta dagitoy a barangay ti naapektaran idi iti aluyo.

Agdagup iti 57 a mangngalap iti Barangay Pantay Laud ken 20 a mangngalap iti Barangay Mindoro dagiti benepisario, innayon ni Raboy.#