BANNER: 2 masipsiputan nainbolbar iti droga, natiliw iti search, buy-bust ops

BANTAY, Ilocos Sur – Nadagsen dagiti kaso a sanguen daytoy a negosiante agsipud ta saan laeng a droga no di pay granada ti nakumpiska iti pagtaenganna sadiay Barangay Cabalanggan ditoy nga ili bayat ti search operation nga inwayat ti kapolisan idi agsapa ti Septiembre 29.

Positibo ti panagsukisok dagiti nagtitipon nga elemento ti Bantay Police Station nga indauluan ni OIC, Police Inspector Edmund Nartatez ken dagiti operatiba ti PIB nga indauluan ni Supt. Elpidio R. Nartates, DPDO, ken iti babaen ti direkta a superbision ni Senior Supt. Tito Gamboa Dacpano, OIC ti Provincial Police Office, iti balay ni Leonardo Rochina y Piano, Jr., 36, naasawaan, negosiante, ken residente iti Barangay Cabalanggan, Bantay a nakasamsamanda kadagiti droga, paraphernalia, balbala ken granada.

Imet dagiti operatiba ti Search Warrant No. 14, Sā€™2016 nga inyisio ni Judge Marita Balloguing ti RTC Branch 20, Vigan City idi sinukisokda ti balay ni Rochina.

Nakakumpiska dagiti nagsukisok iti pito a heat sealed plastic sachets a naglaon iti mapapati a shabu a naikabil iti eye glass case; 3 elongated aluminum foils, maysa narolio nga aluminum foil; 6 live ammunition para iti cal.22, ken hand grenade.

Sinaksian dagiti barangay officials ken pannakabagi ti media ti naiwayat a panagsukisok.

Nakalista ni Rochina kas street level target iti drug watch list ti Bantay police station.

Kabayatanna, sabali pay a drug surrenderee iti Narvacan Police Station ti nanabtuog iti buy-bust operation nga inwayat ti joint personnel ti Sta. Maria MPS, Narvacan MPS ken PDEA sadiay Barangay San Jose, Narvacan idi malem ti Septiembre 29.

Nakumpiska iti ikut ni Edward Cahola y Cachola, 34, baro, mannalon, ken residente iti Barangay Dasay, Narvacan, dagiti sumaganad: dua a heat- sealed plastic sachet a nagkarga iti mapapati a shabu; P1,000.00 nga addaan Serial No. BN384019 a naaramat a buy bust money; P620.00 iti nadumaduma a denominasion; disposable lighter; Samsung cellphone; box a naglaon iti black flashlight; maysa a pakete ti Mighty cigarette a naglaon iti maysa nga stick; 2 plastic sachet a nagkarga iti bukel ti atsuete (annatto) ken black Suzuki Rider motorcycle.

Naipan ti suspek agraman dagiti nakumpiska kenkuana iti police station ti Sta. Maria para iti dokumentasion sa naipan iti Ilocos Sur Crime Laboratory Office para iti drug test ken laboratory examination.

Maysa met ni Cahola a drug surrenderee iti Narvacan Police Station. (Tawid News Team)