BANNER: 2 surrenderees, 2 kabarbaro users, natiliw iti police operations

VIGAN CITY- Nupay rinibribu dagiti simmuko iti kapolisan kas suportada iti kampania ni Presidente Rodrigo Duterte maikontra iti illegal a droga, adda dagiti nagtured a nagsubli iti illegal nga aktibidadda idinto a sumagmamano ti kabarbaro a rupa ti simrek iti daytoy illegal a negosio. Ngem naing-inget ita ti kampania maikontra iti maiparparit a droga ket saanda a nakalusot iti ima ti linteg.

Nakalista a kabarbaro a drug personality ni Danilo Manuel y Ramboyon, 48, awanan asawa, mannalon, ken residente iti Barangay Cabittaogan, Sta. Catalina, ngem natiliw dagiti polis a nagikut iti maiparparit a droga idi aldaw ti Septiembre 22.

Nangipasdek dagiti polis iti checkpoint iti provincial road ti Barangay Cabuloan idi nakaawatda iti impormasion manipud iti maysa a confidential asset nga adda ikut a droga ti maysa a lalaki a nakaaruat iti puraw a t-shirt ken maong a short pants ken nakakallugong a nakasakay iti Nouvo Z Yamaha nga aggapu iti daya a direksion.

Inampara dagiti polis ti suspek a nabigbig idi agangay a ni Manuel sada pinadissaag iti motorsiklona.

Nagtungpal ni Manuel ngem nasiputan ni PO1 Reolizo ti panangipalladaw ti suspek ti maysa a plastic sachet iti daga.

Pinidut ni Reolizo ti plastic sachet ket naduktalan a nagkarga iti dua a babassit a plastic sachet a nagkarga iti mapapati a shabu.

Iti panagsukimat dagiti polis iti motorsiklo ti suspek iti imatang dagiti barangay officials ken pannakabagi ti Department of Justice, nakasukainda iti maysa a Tic-Tac plastic container a nagkarga iti bassit a plastic sachet a naglaon iti mapapati a shabu.

Naikustodia ti suspek ken dagiti nakumpiska kenkuana iti police station ti Sta. Catalina.

Kabayatanna, tallo a tattao ti inaresto ti nagtitipon nge elemento ti kapolisan kalpasan a nagpositibo ti inwayatda a panagsukisok idi malem daytoy met la a petsa iti pagkaseraan dagiti suspek sadiay Barangay VII, Vigan City.

Naaresto da Guillermo Salvanera Alcid, 29, awanan asawa, drug user a nakalista iti watch list kas surrenderer; Ma. Rosario Benzon Salvanera, 24, awanan asawa, kabarbaro a nabigbig a user; ken Mark Jayson Acas Madriaga, 28, natibo iti Brgy. Naguiddayan, Bantay, Ilocos Sur, nairaman iti watch list kas surrenderer.

Nakakumpiska dagiti nagsukisok iti innem a small heat sealed plastic sachet a nagkarga iti mapapati a shabu; maysa nga open plastic sachet a nagkarga iti mapapati a shabu; P1,185.00 iti nadumaduma a denominasion ken assorted drug paraphernalia.

Sinaksian dagiti barangay officials, reporter manipud ti Bombo Radyo ken pannakabagi ti DOJ ti pannakainbentario dagiti nakumpiska manipud kadagiti suspek.#