Latest News: BANNER: 230 MSMEs makipaset iti Vigan Solidarity Festival Trade Fair | Tawid News Magazine - Weekly Ilocos News đź“°

BANNER: 230 MSMEs makipaset iti Vigan Solidarity Festival Trade Fair

By Imelda C. Rivero, PIA, Ilocos Sur

 

VIGAN CITY – Umabot iti 230 a “micro, small and medium enterprises” (MSMEs) ti umay agilako iti dekalidad a produktoda iti trade fair a paset ti selebrasion ti 2016 Vigan Solidarity Cultural Festival a maluktan inton Septiembre 5.

Ita a tawen, maiyalis ti puesto ti trade fair iti amianan a paset ti Vigan City Convention Center  manipud iti Plaza Burgos tapno mapalukayan ti trapiko iti aglawlaw ti plasa a kadawyan a pagpasiaran dagiti adu a turista, bisita ken umili. Ti Plaza Burgos ngamin ti ayan dagiti panganan ti empanada; sungadan ti World’s Heritage Village iti abagatan; ken ti Saint Paul Metropolitan Cathedral ken Plaza Salcedo nga ayan ti “dancing fountain” iti amianan.

Kuna ni Herminigildo Etrata, agdama a city cooperative officer, nga aggapu iti naduma-duma a paset ti Luzon ken pakairamanan ti Bicol dagiti agpartisipar iti trade fair.

Kabayatanna, kiniddaw ni Mayor Carlo Medina ti pannakipaset dagiti turista ken umili kadagiti nadumaduma a programa para ti 2016 Vigan Solidarity Cultural Festival manipud Septiembre 4 – 10 a kas kadagiti sumaganad: Alay Lakad (Sept. 4); pannakalukat  ti  Monochrome Connection art exhibit dagiti agad-adal iti University of Northern Philippines, College of Fine Arts iti Vigan City Legislative building ken pannakalukat ti trade fair (Sept.5); Fotografias y Recuerdos, ken  Historia Oral iti Vigan Culture and Trade Center; Folkdance contest ken Zarzuela Ilocana iti Plaza Burgos (Sept. 6); Sabayang Pagbigkas, Dance Sports contest para kadagiti mangisursuro ti elementaria iti Plaza Burgos (Sept. 7); Nasagraduan a Misa ken panagsapata manen dagiti agindeg para iti pannakapreserbar ti tawid iti Saint Paul Cathedral, pammigat, “dancesports ken puppetry contest iti Plaza Burgos (Sept. 8); ken Repazzo de Vigan, Salisal iti panagkanta, daniw, dallot iti Plaza Burgos (Set. 9).

Inton Sept. 10, maudi nga aldaw ti pannakaited dagiti pammadayaw ken “cultural show” iti Plaza Burgos.#