BANNER: 28-K kapuon marihuana, pinag-ot dagiti polis iti tri-boundary ti Ilocos Sur, La Union, Benguet

SUGPON, Ilocos Sur – Tallo a plantasion a namulaan iti maiparparit a marihuana iti nagbeddengan ti La Union, Ilocos Sur ken Benguet ti dinadael dagiti nagtitipon nga elemento ti kapolisan idi Agosto 13.

Naiwayat ti operasion babaen ti Santol Police Station iti panangidaulo da Senior Inspector Antonio A. Marzan, Jr.; Sugpon police station iti panangidaulo ni Senior Inspector Aristeo T. Tajon; Ilocos Sur PPSC nga impanguluan ni Senior Inspector Res Gerome B. Cachin ken PDEA RO1 iti panangidaulo ni Agent Christopher Ramos.

Partikular a puntiria  ti illegal drug operation nga inwayat ti kapolisan ti Mt. Ginmunsod, Barangay Licungan, ditoy nga ili, a masarakan iti pagbeddengan ti La Union, Ilocos Sur ken Benguet  a nagresulta iti pannakaduktal dagiti tallo a plantasion nga aglawa iti 1,800 metro kuadrado a pakatartaraknan dagiti mula a marihuana.

Pinag-ot dagiti operatiba ti sumurok kumurang 28,000 a fully grown marijuana plants a naimula iti tallo a plantasion a mapattapatta nga addaan iti balor a P6,800,000.00, sada pinuoran karaman ti 100 gramo a bukel ti marihuana a naikabil iti botelia a plastik nga agbalor iti P25,000.00.

Nakarekobre pay dagiti operatiba iti weighing scale iti plantasion.

Sumagmamano kapunggos laeng a kapuon ti marihuana ti imbaba dagiti polis kas  ebidensia iti naiwayat nga operasion.

Awan ti naireport a naipiskot dagiti operatiba a mangtartaraken kadagiti mula a marihuana.

Iti nagbeddengan ti La Union, Ilocos Sur ken Benguet ti masansan a pakaipakatan iti operasion ti kapolisan  agsipud ta ditoy ti nakaduktalan kadagiti plantasion ti marihuana iti kallabes.#