BANNER: 3 drug surenderees napaltogan, maysa DOA iti ospital

SINAIT, Ilocos Sur – Tallo manen nga insidente ti pam-maltog ti naiwayat ditoy probinsia a drug surenderees ti puntiria dagiti hitman a nakagudasan ti maysa.

Iti pammaltog sadiay Barangay Ricudo ditoy nga ili idi rabii ti Agosto 12, illegal drug trade ti kitkitaen dagiti polis ditoy a ramut ti pannakagandat ti biag ti maysa a surenderee.

Segun iti polis, kangrunaan a suspek iti pannakagandat ti biag ni Bernardo Ines y Sarabia, 31, baro, mannalon, ken residente iti Barangay Calingayan, Sinait, Ilocos Sur ti maysa nga agnagan iti Joseph Mercado y Agdeppa, 29, baro, mannalon, ken residente iti Barangay Marnay ditoy met laeng nga ili.

Agpada a drug surenderee dagiti dua. Simmuko iti polis ni Ines idi Hulio 20 idinto nga idi Agosto 4 ni Mercado. Nakalista ni Ines a masipsiputan a drug personality.

Saan pay nga ammo no apay a ginandat a patayen ni Mercado ti padana a drug surenderee.

Kas maibatay iti report, kabayatan nga adda ni Ines iti balay ti kabsatna a ni Grace Ilustrisimo, inayaban ti maysa a Dagul Ilustrisimo a rummuar tapno kapatangna ni Mercado.

Idi nakaasideg ni Ines, mapapati a pinaltogan ni Mercado iti sumagmamano a beses a nakatiruan ti tengnged ken makannawan nga ubet ti biktima.

Nupay kasta, nakataray a simrek iti balay ni Ines. Naglibas met a nagpaamianan ti suspek a nakasakay iti motorsiklo.

Immuna nga intaray dagiti nagresponde a polis ni Ines iti Corpuz  Clinic and Hospital, Sinait sa naiyalis daytoy iti Don Mariano Marcos Memorial Hospital, Batac City.

Saan pay nga ammo no ania a klase a paltog ti naaramat iti pammaltog ta awan ti nasa-rakan dagiti inbestigador a kapsula wenno buli iti nakapasamakan ti krimen.

Iti sabali pay a damag, maysa met laeng a simmuko a drug personality ti nagandat ti biagna iti uneg ti pagpallotan sadiay Barangay Gongogong, San Ildefonso, Ilocos Sur idi 11:20 ti bigat ti Agosto 11.

Naitaray iti Northside Doctor’s Hospital, Guimod, Bantay ni Warren Cubangbang y Calaoagan, 35, naasawaan, kristo iti pallotan, ken residente iti Barangay San Sebastian, San Vicente, Ilocos Sur gapu iti linak-amna a sugat iti likudna.

Iti panagimbestiga ti SOCO team nga indauluan ni Chief Inspector Redentor Arce iti nakapasamakan ti pammaltog, nakasarakda iti maysa a kapsula ken maysa a buli a mapapati a naggapu iti cal. 45.

Maysa ni Cubangbang kadagiti drug personality a simmuko iti San Vicente police station itay nabiit.

Kabayatanna, sinigurado dagiti kriminal nga awanen ti biag ti maysa a traffic aide sakbayda a naglibas nga agturong iti abagatan a direksion a nakalugan iti motorsiklo a nalabaga.

Napasamak ti pammapatay iti igid ti kalsada iti sango ti Sinait West Central School Barangay Macabiag, Sinait idi agarup 2:50 ti malem ti Agosto 10 a nakagudasan ni Edwin Abejero, Jr. y Palpallatoc, 29, baro, traffic aide.

Segun kadagiti di nainaganan a saksi, agtaktakder ni Abejero iti waiting shed iti sanguanan ti nadakamat a pagadalan idi immasideg dagiti suspek ket maysa ti nangpaltog iti biktima sada naglibas nga agpaabagatan a nakasakay iti motorsiklo.

Naideklara ni Abejero a dead on arrival iti Sinait District Hospital a nakaitarayanna.

Nakarekobre iti crime scene dagiti polis iti walo a kapsula manipud iti cal. 45, 4 a naiputok a bala, ken maysa a metallic fragment.

Segun iti polis-Sinait, nakalista ni Abejero a drug personality high value target (HVT) Level 3 ken surenderee idi Hulio 28.

Madama ti panagimbestiga ti kapolisan no bihilante a grupo wenno kakumpitensia iti negosio ti droga ti adda iti likudan ti nasao a pammapatay. (Tawid News team)