BANNER: 3 masuspetsa agpolpolitika a barangay officials

TAGUDIN, Ilocos Sur – Tallo a barangay official ti nagpulong iti kapolisan a  pinaturongan ken binallaagan ida dagiti nagtagiarmas a lalaki maigapu iti mapapati a pannakibiangda iti politika iti lugarda.

Iti naladaw a reportda iti polis, kinuna da Barangay Captain Ruben Agosto, 45, naasawaan, ken Kagawad Robert Arce y Cabacungan, 51, naasawaan, agpada a residente iti Barangay Ambucao, a pinaturongan ken pinangtaan ida ti lima nga armado a lalaki idi agarup 9:00 ti sardam ti Abril 30.

Kas insalaysay ni Arce, agarup 6:00 ti sardam idi nagturong dagiti armado a lalaki iti balayna sada intebbag a kayatda a kapatang idinto a nakapaturong kenkuana dagiti paltog dagitoy nga M16 rifles.

Kinuna ni Arce a kasaruno daytoy ti panangballaag ti grupo kenkuana a saan a bumibiang iti politika ket allukoyenna ketdi ti pamiliana a mapanda iti bangir.

Innayon ni  Arce nga impangta ti grupo a no saan nga agtungpal, ti pamiliana ti kakaasi.

Kalpasanna, maysa kadagiti armado a lalaki ti nanggammat iti selpon ni Arce sana imbilin a tawaganna ni Barangay Captain Ruben Agosto tapno mapan iti balay ni Arce.

Nagpuesto dagiti armado a lalaki iti asideg ti balay ni Arce sada sinatdaan  ti owner type jeep a lugan ti barangay captain, kaduana ti anakna ken maysa a di nainaganan a kalugaranda

Idi makadanon ti lugan iti nagpuestoan dagiti suspek, rimmuar dagitoy sada pinaturongan dagiti naglugan iti dyip ken imbilin ti ididissaagda.

Kinuna ni Agosto a maysa kadagiti armado a lalaki ti nagdamag no asino kadakuada ti barangay captain ken no adda iggemna a selpon ken ikutna a paltog.

Kas iti inaramidda ken ni Arce, binallaagan dagiti  suspek a saan a makibiang ni Agosto iti politika ta dinto kaasi ti pamiliana.

Puersa nga innala dagiti suspek ti dua a selpon ken ti petaka ni Agosto a naglaon iti sumurok kumurang P6,000.00.

Naglibas dagiti suspek a nagturong iti kabambantayan a paset ti barangay kalpasanna.

Kabayatanna, nagpulong met ni Barangay Captain Romeo Aguilar y Daoa, 55, naasawaan, ken residente iti Barangay Baracbac, Tagudin nga idi sardam ti Mayo 2,  pinaturongan iti paltog ken pinangtaan ti tallo a lalaki  gapu iti mapapati a panaggatangna iti butos.

Segun iti panagimbestiga dagiti polis, idi agarup 6:25 ti sardam ti nadakamat a petsa, bayat nga agbuybuyada a sangapamilia iti telebision, nagpakusina ni Aguilar tapno uminom iti danum idi nasiputanna ti puraw a van a nagsardeng iti sumurok-kumurang 15 metro iti sanguanan ti balayna ket tallo a lalaki nga armado ti dimsaag sa simrek iti balayda.

Mapapati a pinaturongan dagiti suspek ni Aguilar iti paltog sada rinabsut dagiti sample ballots ken leaflets ti eleksion nga inted ti Comelec nga iwarasna kadagiti kalugaranna.

Segun ken ni Aguilar, kinompronta ti maysa a suspek a nagkuna:  “Nagbo-vote buying ka ba? Isama ka namin sa taas. Ubusin namin pamilya mo, walang magsusumbong at magsasalita. Ilabas mo yong baril mo.”

Kinuna pay ni Aguilar a sakbay a pimmanaw dagiti suspek, ginurnotda ti campaign poster ni incumbent Mayor Pepito Bunoan a naibartay iti asideg ti balayna.

Kinuna ni Aguilar a dina nakita a nalawag ti modelo ken numero ti plaka ti puraw a van agsipud ta nagintek iti uneg ti balayna gapu iti butengna.

Iti pannakaisurat daytoy, saan pay a nabigbig dagiti suspek. Saan pay met nga ammo no kamengda ti News People’s Army.

Agtultuloy ti panagimbestiga dagiti polis mainaig iti nasao nga insidente.#