BANNER: 3 nasugatan iti shootout iti asideg ti municipal building

STA. MARIA, Ilocos Sur – Kasla eksena manipud iti pelikula idi panawen ti Wild Wild West ti napasamak a panagpipinnaltog dagiti armado a lalaki iti asideg ti municipal building ditoy idi aldaw ti Agosto 3.

Kalpasan ti panagpukaw dagiti kanalbuong, tallo kadagiti nagpipinnaltog ti naitaray iti ospital gapu kadagiti sinagrapda a sugat.

Nasugatan ti ulo ni Emiterio Dasalla, ODU, residente iti Barangay Danuman West, Sta. Maria; naglak-am iti sugat iti makannigid a sakana ni Johnlee Bunagan y Natividad, ODU, residente met laeng iti Barangay Danuman West; nagsagrap iti sugat iti makannawan a sakana ni Laurence Montero y Adona, 27, residente iti Barangay San Antonio, Narvacan; ken nasugatan ti kilikili ken makannawan a siket ken makannigid a sakana ni Robert Cambe y Capalugan, 49, residente iti Barangay Paratong, Narvacan, Ilocos Sur.

Naitaray ni Dasalla ken Bunagan iti Reyes Clinic and Hospital, Sta. Maria, sada naiyalis iti Metro Vigan Cooperative Bank, Bantay, Ilocos Sur a guardiado iti PNP SWAT, Ilocos Sur PPO.

Naipan met da Montero ken Cambe iti Central Ilocos Sur District Hospital, Paratong, Narvacan, Ilocos Sur ket guardiadoda iti polis manipud iti ISPPSC.

Nakakumpiska dagiti nagresponde a polis iti maysa a Charles Daly Cal. 45 pistol nga addaan magazine assembly a nagkarga iti dua a bala manipud ken ni Cambe; maysa nga Armscor Cal. 45 pistol nga addaan magazine assembly a nagkarga iti dua a bala manipud ken ni Bunagan; ken maysa nga Armscor Cal. 45 nga addaan iti magazine assembly a nagkarga met iti tallo a bala manipud ken ni Montero.

Nakarekobre pay dagiti inbestigador iti 14 a kapsula manipud iti Cal. 45 ken 5 a deformed slug manipud iti Cal. 45 iti nakapasamakan iti shootout.

Sabali laeng ti nakumpiska dagiti polis a magazine assembly a naglaon iti 4 a bala para iti Cal. 45 iti short pant ni Montero.

Panagkolekta iti utang ti mapapati a motibo ti panagpipinnaltog.

Iti inisial a panagimbestiga ti polis, kalkalpas a nagmerienda da Bunagan, Dasalla, Anabelle Arquines y Dar ken Marivic Gliam y Dar iti maysa a food chain iti asideg ti municipal hall building, ket aglugan koman da Bunagan ken Gliam iti Toyota Fortuner idi dua a lalaki a nagkalubbon iti motorsiklo a nabigbig idi agangay a da Montero ken Cambe, ti immasideg sa pinaturongan ti maysa iti paltog ni Gliam.

Nasiputan ni Dasalla ti inaramid ti suspek ket dinungparna daytoy.

Pinaltogan ti back-up ni Dasalla. Bimmales met ni Bunagan ket nakipinnaltog kadagiti suspek.

Nagresponde dagiti polis a nairana nga adda seminarda ket

Iti pannakaisurat daytoy, nakasuan ni Cambe iti attempted murder ken frustrated homicide ken panaglabsing iti RA 10591.

Nakasuan met ni Bunagan iti panaglabsing iti RA 10591, ket nai-docket daytoy iti babaen ti Criminal Case No. 3986-N.

Nupay kasta, nawayawayaan ni Bunagan kalpasan a nagpiansa iti P80,000.00.#