BANNER: 3,040 paputok, nakumpiska iti pannakaselebrar ti Paskua

CANDON CITY – Nasurok a tallo ribu a paputok a pakairamanan ti 27 a boga ti nakumpiska ti kapolisan iti innem nga ili ditoy probinsia kas paset ti inwayatda a kampania maikontra iti panaglako kadagiti maiparit a paputok iti panangselebrar iti Paskua.

Idi agarup 4:40 ti malem ti Disiembre 24, dua a polyvinyl pipes a maawagan iti boga ti nakumpiska dagiti intelligence operatives ti Candon City police station iti national highway ti Barangay San Nicolas. partikular iti sanguanan ti CSI Stern Mall

Ngem nasiputan ti akinkukua dagiti polis ket tinarayanna dagiti nasao nga improvised a kanion.

Idi agarup 6:00 ti malem ti Disiembre 25, 18 nga improvised boga ti nakumpiska dagiti polis-Vigan nga indauluan ni OIC, Police Supt. Villaflor Sabio Bannawagan iti nadumaduma a lugar iti siudad.

Nupay adda dagiti natiliw, binallakadan ida dagiti polis a saanda nga aramaten daytoy agsipud ta maibilang nga illegal ken maiparit a paputok.

Naipan iti police station dagiti nakumpiska a boga para iti dokumentasion.

Idi agarup 7:20 ti sardam daytoy met laeng a petsa, bayat ti panagpatrolia dagiti polis iti Barangay Cabuloan, Sta. Catalina,, nakangegda iti kanalbuong ngem idi nakaasidegda, nagtataray ti grupo dagiti lallaki iti nadumaduma a direksion ket pinanawanda dagiti dua a boga.

Kabayatanna, nagbalin a biktima iti paputok ni John Mar Caraveo y Florendo, 13, residente iti Barangay Libtong, Tagudin.

Segun iti report, idi agarup 10:00 ti bigat ti Disiembre 26, gimmatang ni Caraveo iti piccolo iti kaarrubada ket idi ginangtanna daytoy, kellaat a bimtak a nakadunoran ti kannawan a tangan, tammudo ken akin-tengnga a ramayna.

Intudo ni Caraveo ni Shiela Marie Baraza y Barazar, 27, awanan asawa, a naglako iti piccolo.

Naipaiman iti opisina ti provincial prosecutor ti kaso a panaglabsing iti RA 7183 maikontra ken ni Castro.

Iti sabali a damag, idi agarup 1:00 ti malem ti Disiembre 26, 100 a pakete ti piccolo wenno 3,000 pedaso ti boluntario nga insuko ni Ronald Mendoza y Cornelio, 43, naasawaan, manadier ti Golden Maru Fireworks ken residente iti Barangay Baclig, Cabugao, Ilocos Sur.

Adda itan dagitoy illegal a paputok iti kustodia ti Cabugao police station.

Idi agarup 8:00 ti rabii iti daytoy met la a petsa, 3 a boga, 2 nga awan naggianna a lata ti gatas ken maysa a lata ti sardinas ti nakumpisa dagiti agpatpatrolia a polis sadiay Barangay Lungog, Narvacan, Ilocos Sur.

Tinarayan dagiti agpalpalibong dagiti boga idi masaripatpatanda dagiti polis.

Idi agarup 10:55 ti rabii ti Disiembre 27, bayat met ti panagpatrolia dagiti polis-Sta. Catalina, nakaawatda iti mensahe nga adda grupo dagiti lalaki nga agpappaputok babaen ti boga iti Barangay Cabaroan.

Ngem nagsitakias dagiti lallaki idi sumungad dagiti polis ket pinanawanda lattan dagiti boga. (Tawid News Team)