BANNER: 5 naaresto iti agtultuloy nga operasion kontra droga

CAMP ELPIDIO QUIRINO, BANTAY, Ilocos Sur – Lima pay a tattao ti inaresto dagiti polis iti nagsasaruno nga operasion iti droga nga insayangkatda idi Hulio 28-29 kas panangipakitada a saan nga agsarday ti kampaniada maipapan iti droga.

Naaresto da Virgilio TalaƱa, Jr. y Yadao, 49, residente iti Barangay Pug-os, Sinait, Ilocos Sur; Maximo Madriaga y Jaramillio, residente iti Barangay Sto. Tomas, Sto. Domingo, Ilocos Sur; George Querubin y Utang, 39, residente iti Barangay Rubio, Galimuyod, Ilocos Sur; ken Ernanie Velasquez y Salido, 38, ken residente iti Barangay San Isidro, Candon City.

Nagtitipon ti kapolisan ti Sinait municipal police station, PIB Ilocos Sur, ISPAIDSOTG, PDEA, CIDT Ilocos Sur Team, ISSETI ken IS-HPG a nangipakat iti search warrant iti pagtaengan ni TalaƱa sadiay Barangay Pug-os idi agarup 6:00 iti agsapa ti Hulio 28 a nagresulta iti pannakakumpiskada kadagiti plastic sachet a naglaon iti mapapati a shabu ken drug paraphernalia.

Karaman a natiliw ni Eugene Tagudar y Matia-ong, 34, residente iti Barangay Calay-ab, Sto. Domingo, Ilocos Sur a nasalamaan dagiti operatiba iti uneg ti balay ni TalaƱa.

Iti Sto. Domingo, insigida a nangipasdek dagiti polis iti checkpoint iti national highway a sakup ti Barangay San Pablo, kalpasan a nakaawatda iti impormasion a maysa a drug personality a nakaaruat iti gray t-shirt ken camouflaged short pants a nakalugan iti nalabaga a Yamaha RXT 135 motorcycle nga awanan plate number ti lumabas iti nadakamat a lugar.

Segun iti impormasion manipud iti saan a nagpabigbig a tao, naggapu ni Maximo Madriaga y Jaramillo iti maysa a lugar sadiay Sinait, Ilocos Sur a gimmatanganna iti droga.

Idi sumungad ni Madriaga, pinara dagiti polis agsipud ta awan ti aruatna a helmet.

Idi iruar ni Madriaga ti petakana tapno ipakitana ti lisensiana, natinnag ti maysa a heat sealed plastic sachet a mapapati a nagkarga iti shabu.

Dagus nga inaresto dagiti polis ti suspek sada impan iti police station.

Iti pannakaisurat daytoy, naiyendorson ti kaso a panagikut iti illegal a droga maikontra ken ni Madriaga.

Iti Galimuyod, Ilocos Sur, inreport ti maysa nga empleado ti munisipio a natiliwanna ti maysa a baro nga akto nga agusar iti shabu.

Segun ken ni Minard Tumacdang y Novida, 35, municipal employee, ken residente iti Barangay Rubio, Galimuyod, idi agarup 8:00 yi rabii ti Hulio 28, nakitana ni George Quirubin y Utang a nangdadael iti screen fence ti tiendana ken nagprobokar.

Kabigatanna, napan ni Tumacdang iti balay ni Querubin tapno salangadenna ket nakitana daytoy iti akto nga agusar iti droga isu a dagus nga impulongna iti polis.

Idi rinikisa dagiti nagresponde a polis ni Querubin, nasukainanda ti maysa a heat sealed plastic sachet a naglaon iti mapapati a shabu ken dua nga aluminum foil.

Malaksid iti panaglabsing iti RA 9165, nakasuan pay ni Querubin iti malicious mischief gapu iti panangdadaelna iti screen fence ti tienda ni Tumacdang.

Kabayatanna, nanabtuog iti buy bust operation ni Ernanie Velasquez y Salido nga impakat ti nagtipon nga elemento ti Candon City police station ken Sta. Cruz police station idi agarup 4:45 ti malem ti Hulio 29 sadiay Barangay San Isidro, Candon City.

Nakakumpiska dagiti polis iti ikut ni Velasquez iti maysa a heat sealed plastic sachet a nagkarga iti mapapati a shabu, maysa a cellular phone, ken lima a sag-P100.00 a marked money.

Sabali laeng ti nakumpiska dagiti polis a maysa a heat sealed plastic sachet a naglaon iti mapapati a shabu, 5 a crumpled aluminium foil a mapapati a nagkarga iti shabu residue, 8 a nakalukat nga usado a plastic sachet a mapapati a nagkarga iti shabu residue, nakalukat a plastic sachet a nagkarga iti white crystalline substance, 3 elongated aluminum foil, (3) packs a plastic sachet, maysa a plastic container, maysa a transparent plastic sachet a naglaon iti sabali a plastic sachet a mapapati nga addaan shabu residue, 5 a disposable lighter, plastic container a nagkarga iti glass tubes, improvised glass totter, 3 nga improvised straw scoop, getteng, 7 a bala para Cal .38 ken maysa a bala para Cal 9mm a nasarakan iti beranda ti balay ti suspek.#