Abogado, 3 pay, nagsasaruno ginudas masuspetsa hitmen

CABUGAO, Ilocos Sur – Umat-atiddog latta ti listaan dagiti mapalpaltogan ditoy probinsia a kaaduanna kadakuada dagiti nainbolbar iti illegal a droga.

Iti las-ud ti lima nga aldaw manipud idi Septiembre 11 agingga idi Septiembre 15, uppat manen ti naireport a napapatay iti probinsia a pakairamanan ti maysa a barangay kagawad sadiay Magsingal; maysa a tomboy sadiay Cabugao; maysa nga abogado sadiay Magsingal manen; ken maysa a negosiante sadiay Bantay.

Idi agarup 4:15 ti malem ti Septiembre 11, napaltogan iti sanguanan ti balayna ni Barangay Kagawad Darwin Tiri y Ugas, 41, awanan asawa, residente iti Barangay San Julian, Magsingal.

Madama ti panaggiinom da Tiri ken tallo a kakaduana iti sanguanan ti balayna nga adda iti asideg ti provincial road idi pinaltogan dagiti suspek a nagaruat iti bonnet ken nakalugan iti Rusi motorcycle nga awanan plate number.

Nagpalaud a direksion dagiti suspek kalpasan ti pammaltog.

Naitaray iti Magsingal District Hospital ti biktima ngem naideklara a dead on arrival gapu kadagiti sugatna iti nadumaduma a paset ti bagina.

Nakarekobre dagiti inbestigador iti walo a kapsula ken maysa a buli manipud iti cal. 45.

Nakalista ni Tiri iti drug watch list ti Magsingal police station, municipal level – HVT – Level 2.

Idi malem ti Septiembre 14, maysa a report ti dimmanon iti Cabugao police station mainaig iti pammaltog a napasamak iti Barangay Pug-os, Cabugao.

Nainaganan ti biktima a ni Johana Sablay y Badjang, 23, tomboy, residente iti Barangay Jordan, Sinait, nakalista a drug surrenderer iti nadakamat nga ili.

Agpaabagatan a direksion ni Sablay a nakalugan iti motorsiklona a Motophos ket idi nagmenor iti maar-aramid a kalsada iti Barangay Pug-os, kellaat a pinaltogan ti maysa a lalaki a nakalugan iti puraw a van.

Kinuna ti insakay ni Sablay a ni Apple Joy Leonar, 17, residente iti Barangay Baclig, Cabugao, Ilocos Sur, dimsaag ti suspek sana pinaltogan iti namindua ti biktima. Kas panangiladawan ni Leonar, nakaaruat iti nangisit a leather jacket ti suspek, agtayag iti lima kadapan, agtawen iti nasurok a 30, ken napugot.

Nagpakaskas ti lugan ti suspek a nagpaabagatan.

Naitaray ti biktima iti Pira Clinic and Hospital, Cabugao ngem naideklara a dead on arrival gapu kadagiti sugatna iti ulona.

Nakarekobre ti SOCO team iti tallo a kapsula a nagtaud manipud iti cal. 45.

Idi agarup 5:47 ti malem ti Septiembre 15, bayat ti pannakagasolina ti Isuzu Sportivo (WDY 789) a lugan ni Atty. Melver Tolentino y Garace, 42, iti Shell Gasoline Station sadiay Barangay Sta. Monica, Magsingal, dua a nakakallugong ken nagaruat iti nangisit a diaket a lalaki a nagsakay iti nangisit ken puraw a motorsiklo ti kellaat nga immasideg iti lugan ni Tolentino sada pinaltogan iti namin-adu a beses ti abogado.

Naglibas dagiti suspek iti abagatan a direksion.

Duapulo ket maysa a kapsula a mapapati a nagtaud iti 5.56 ti narekobre dagiti personnel ti SOCO team a nakabase iti Ilocos Sur Police Provincial Office.

Segun iti mapagtalkan a source, adda dagiti kaso iti droga nga iniggaman ni Tolentino iti kallabes.

Sabali pay a pammaltog ti naiwayat idi agarup 9:00 ti rabii iti daytoy met la a petsa a nakatayan ni Samuel Andallo y Pascua, 52, naasawaan, store owner, ken residente iti Zone 4, Bantay, Ilocos Sur.

Kas maibatay iti report manipud iti Bantay police station, tartarimaanen ni Andallo dagiti lamisaan ken tugaw iti ruar ti tiendana idi simmardeng iti asidegna ti maysa a Honda XRM motorcycle nga awanan plate number ket dimsaag ti back rider a nakaaruat iti nangisit a diaket ken nangisit a helmet sana pinaltogan iti sumagmamano a beses ti biktima.

Naglibas dagiti suspek iti laud a direksion.

Naitaray ti biktima iti Metro Vigan Cooperative Hospital, Bantay, Ilocos Sur ngem saanen a naidanon ti biagna iti balay-pagagasan.

Iti panagimbestiga ti kapolisan, naammuan a nakalista a drug personality ni Andallo ken boluntario a simmuko iti police station ti Bantay.

Iti panangproseso ti SOCO team manipud iti ISPPO, Bulag, Bantay iti crime scene, nakarekobreda iti 9 a kapsula para iti cal. 45, dua a naiputok a bala, 2 a bullet jacket, ken maysa a deformed slug para iti isu met laeng a kalibre.

Naipababaen iti ballistics examination dagiti narekobre nga ebidensia. (Tawid News Team)